October 31, 2020

SinhalaVlog

Just another WordPress site

මස් මාළු බිත්තර නොකා ඉන්න එකටද නිර්මාංසව ඉන්නවා කියන්නේ

ආගමික විශ්වාසයන්, සත්ත්ව හිංසනයට ඇති අකැමැත්ත සහ විවිධ සෞඛ්‍ය හේතූන් මත මිනිසුන් සත්ත්ව ආහාර පරිභෝජනයෙන් වැළකී නිර්මාංසිකයන් බවට පත්වෙනවා. විවිධ රටවල සිදු කෙරෙන සමීක්ෂණවලට අනුකූලව සනාථ වන්නේ බොහෝදෙනා මස්, මාළු ආහාරයට ගැනීමෙන් වැළකීමේ හෝ කුකුළු මස් සහ මාළු ආහාරයට ගත්තද රතු මස් ආහාරයට ගැනීමෙන් වැළකී සිටීමේ ප්‍රවණතාවක් වර්තමානයේදී ලොව පුරා ඇති වෙමින් පවතින බවයි. නමුත් නිර්මාංස වීම නිසා යම් යම් පෝෂණ උෟනතා ඇති වන බවටද මතයක් පවතිනවා. ඒ නිසාම නිර්මාංස වීමට කැමැත්තක් දැක්වුවද බොහෝ දෙනා එයට බියක් දක්වනවා. නිර්මාංස වීම යනු කුමක්ද? නිර්මාංස වීමෙන් පෝෂණ උෟනතා මතුවනවාද යන්න පැහැදිලි කිරීමක් මෙම ලිපියේ අන්තර්ගත වෙනවා. නිර්මාංස වීම ආකාර කිහිපයක් යටතේ කාණ්ඩවලට බෙදා වෙන්කර දැක්වෙනවා.

  1. Lacto Vegetarian – ලැක්ටෝ නිර්මාංසිකයන් මස්, මාළු, බිත්තර වැනි සත්ත්ව ආහාර බැහැර කරන නමුත් කිරි, චීස්, යෝගට්, බටර් වැනි කිරි නිෂ්පාදන භාවිත කරනු ලබයි.
  2. Ovo Vegetarian – මෙම කාණ්ඩය මස්, මාළු, කිරි ආහාරයෙන් වැළකී සිටින අතර බිත්තර පමණක් ආහාරයට ගනී.
  3. Lacto – Ovo – Vegetarian – මස්, මාළු ආහාරයට නොගන්නා අතර කිරි සහ බිත්තර ආහාරයට ගනී.
  4. Vegan – මස්, මාළු, කිරි නිෂ්පාදන බිත්තර හෝ සත්ත්ව නිෂ්පාදන අඩංගු කිසිදු ආහාරයක් හෝ පානයක් භාවිතයට නොගන්නා පුද්ගලයන්.

අද වනවිට ලොව ජනගහනයෙන් 14%ක් පමණ විවිධ හේතූන් මත නිර්මාංස වීමට පෙලඹී තිබෙනවා. නිර්මාංස වීම සමඟ ඇතැම් පිරිස් විවිධ පෝෂණ උෟනතාවලට ගොදුරු වී ඇති බව හඳුනාගෙන තිබෙනවා. විටමින් සහ මිනරල් උෟනතා හේතුවෙන් හිසකෙස් යෑම, නියපොතු ආශ්‍රිත ගැටලු, හිසේ කැක්කුම, උදරාබාධ, රුධිර ධාරිතාවේ ගැටලු, අලස බව, මාංසපේශීන්වල දුර්වලතා ආදිය ඇතිවෙනවා. ඇතැම් රටවල වැඩෙන ශාකමය ආහාර තුළ විටමින් සහ මිනරල් වැඩි වශයෙන් අඩංගු වන්නේ නැහැ. නමුත් දකුණු ආසියාතික රටවල ජීවත්වන අපට මස්, මාළු වෙනුවට ආදේශ කළ හැකි පෝෂණීය ශාකමය ආහාර ඕනෑතරම් සොයාගත හැකිවීම සතුටුදායි කරුණක්. නිර්මාංස ආහාර වේලකට හුරු වීමෙන් දිඩවැඩියාව, අධි රුධිර පීඩනය, කොලෙස්ටරෝල්, අම්ල පිත්ත රෝගය, පිළිකා, ස්නායු ආශ්‍රිත රෝග ඇතිවීම අවම කරගත හැකිය. මස්, මාළු ආහාරයට නොගන්නවා වුවත් ආදේශක ආහාර මඟින් ශරීරයට අත්‍යවශ්‍ය පෝෂ්‍යපදාර්ථ ලබාගන්නේ නම් සත්ත්ව ආහාර නොගැනීම නිසා ඇතිවන උෟනතා මඟහරවා ගැනීමට ඔබට හැකියාව තිබෙනවා.

කොස් ඇට බහුල ලෙස ප්‍රොටීන් අඩංගු එසේම පහසුවෙන් සොයාගත හැකි ආහාරයක්. තවද දඹල, මුං ඇට, උඳු, කව්පි, මෑ, කඩල වැනි ධාන්‍යවලද ප්‍රෝටීන බහුල ලෙස අන්තර්ගතයි. කොල්ලු, රටකජු, ටෝෆු, සෝයා, කුරක්කන්, මුරුංගා කොළ, පලතුරු, එළවළු, කොස් වැනි පෝෂණීය ආහාර තුළින්ද ඔබට අවශ්‍ය විටමින් සහ ප්‍රෝටීන ලබාගැනීමට හැකියාව තිබෙනවා. එසේම උෟනතා වළකාලීම සඳහා විටමින්, මිනරල් පෙති සහ එන්නත් වශයෙන්ද ලබාගත හැකිය. නමුත් ඒ සඳහා යොමු විය යුත්තේ වෛද්‍ය නිර්දේශ මත පමණයි. ආහාර පිසීමේදී ඒවායේ පෝෂණය විනාශ නොවන ආකාරයටත් හොඳින් ශරීරයට අවශෝෂණය වීමට පහසු ලෙසත් සැකසිය යුතුයි. පෝෂණ අවශ්‍යතා නිසි ලෙස හඳුනාගෙන ඒවාට නිසි ආදේශක ආහාර වර්ග යොදාගන්නේ නම් නිර්මාංස වීම එතරම් සෞඛ්‍යයට ගැටලුවක් නොවන බව අවසාන වශයෙන් සටහන් කළ යුතුයි.